እግዚአብሄር በአብዛኛው የሚናገርበት መንገድ

እግዚአብሄር ሰውን በመልኩና በአምሳሉ የፈጠረው ሊያናግረው ነው፡፡ እግዚአብሄር ሰውን የፈጠረው ሊያናግረውና ሊሰማው ነው፡፡

እግዚአብሄር ሁልጊዜ ይናገራል፡፡ እግዚአብሄር አንዳንድ ጊዜ በድምፅ ይናገራል፡፡ ነገር ግን እግዚአብሄር ብዙ ጊዜ በድምፅ አይናገርም፡፡

የእግዚአብሄርን ድምፅ እርሱ በወደደበት ጊዜ ብቻ ወደእኛ ይመጣል፡፡ እኛ የእግዚአብሄርን ድምፅ ማምጣት አንችልም፡፡ እግዚአብሄር ሁልጊዜ በድምፅ እንዲናገረን መፈለግ ትክክል አይደለም፡፡ እግዚአብሄር ሁልጊዜ በድምፅ ስለማይናገር እግዚአብሄር ሁልጊዜ በድምፅ እንዲናገረን መፈለግ ለስህተት ያጋልጠናል፡፡

እግዚአብሄር አስፈላጊ በመሰለው ጊዜ ብቻ በድምጽ ይናገረናል፡፡ 

እግዚአብሄር ግን ሁልጊዜ ስለሁሉም ነገር ሊመራን ይፈልጋል፡፡ እግዚአብሄር ሁልጊዜ ፈቃዱን እንድንፈልግ ይፈልጋል፡፡ እግዚአብሄር ሁልጊዜ ፈቃዱን እንድንከተል ይሻል፡፡

እግዚአብሄር ሁልጊዜ በድምፅ ካልተናገረን ሁልጊዜ የእግዚአብሄርን ፈቃድ የምንለይበት መንገድ የውስጥ ምስክርነት ይባላል፡፡

የእግዚአብሄር ድምፅ አንድ ቃል ወይም አንድ አረፍተ ነገርን በልባችን የምንሰማበት መንገድ ነው፡፡ የውስጥ ምስክርነት ግን ስለ አንድ ነገር ስንፀልይ ፣ በእግዚአብሄር ፊት ጊዜ ስንወስድና ስንቆይ አዎ ወይም አይደለም የሚል ምስክርነት ማግኘት ነው፡፡

የውስጥ ምሰክርነት ስለአንድ ነገር ስንፀልይ እግዚአብሄር ያለውን አስተያየት የእግዚአብሄርን ደስተኛ ወይም የተኮሳተረ ፊት ማየት ነው፡፡ የውስጥ ምስክርነት ስለምንፀልይበት ወይም ስለምናስበው ነገር ልባችን ሰላም መሆኑና አለመሆኑን መለየት ነው፡፡ አይምሮዋችን ሳይሆን ልባችን ከተደሰተ እግዚአብሄር ተደሰተ ማለት ነው፡፡ በአእምሮዋችን ረብሻ እያለ ልባችን ሰላም ከሆነ እግዚአብሄር ቀጥሉ እያለን ነው ማለት ነው፡፡ የልባችን ሰላም ከአእምሮዋችን ሁሉ የሚያልፍ የእግዚአብሄርን ልብ የሚያሳይ ሰላም ነው፡፡  

አእምሮንም ሁሉ የሚያልፍ የእግዚአብሔር ሰላም ልባችሁንና አሳባችሁን በክርስቶስ ኢየሱስ ይጠብቃል። ወደ ፊልጵስዩስ ሰዎች 4፡7

የውስጥ ምስክርነት ልንወስደው ስላለው እርምጃ የደስታን ስሜት ወይም የረብሻ ስሜት በልባችን በመፈልግ እግዚአብሄር ስለእርምጃችን ያለውን ሃሳብ የማወቂያ መንገድ ነው፡፡

እግዚአብሔር አምላክ የሚናገረውን እሰማለሁ፤ ሰላምን ለሕዝቡና ለቅዱሳኑ ልባቸውንም ወደ እርሱ ለሚመልሱ ይናገራልና። መዝሙረ ዳዊት 85፡8

ይህ የውስጥ ምስክርነት እኛ በልባችን ፈልገን የምናገኘው የምሪት አይነት ነው እንጂ እንደ እግዚአብሄር ድምፅ እርሱ ሲናገርን በድምፅ የምንሰማበት መንገድ አይደለም፡፡

እግዚአብሄር ስለሁሉም ነገራችን ምስክርነቱን መስጠት ይፈልጋል፡፡ ከእኛ የሚጠበቀው የውስጥ ምስክርነትን ለማግኘት መፀልይ ምስክርነቱን ለመረዳት ጊዜ መውሰድ ያስፈልጋል፡፡

በእግዚአብሔር መንፈስ የሚመሩ ሁሉ እነዚህ የእግዚአብሔር ልጆች ናቸውና። የእግዚአብሔር ልጆች መሆናችንን ያ መንፈስ ራሱ ከመንፈሳችን ጋር ይመሰክራል። ወደ ሮሜ ሰዎች 8፡14፣16

የእግዚአብሄር ልጅ ነህ ብሎ በድምፅ ባይናገረንም የእግዚአብሄር ልጅ መሆናችንን በውስጣችን ያለው የእግዚአብሄር መንፈስ ከመንፈሳችን ጋር ይመሰክርልናል፡፡ በተመሳሳይ መልኩ በክርስትና ህይወታችን በሙሉ ያ መንፈስ ከመንፈሳችን ጋር ስለ እግዚአብሄር ፈቃድ ይመሰክርልናል፡፡

አቢይ ዋቁማ ዲንሳ Abiy Wakuma Dinsa

ይህን ፅሁፍ ለሌሎች ሼር   share ያድርጉ!

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #መንፈስ #ቤተክርስትያን #አማርኛ #ስብከት #መዳን #የውስጥምስክርነት #መፅሃፍቅዱስ #ልብ #እምነት #ምሪት #ድምፅ #ጌታ #ሰላም #ደስታ #አቢይ #አቢይዋቁማ #አቢይዋቁማዲንሳ #እወጃ #መናገር #ፅናት #ትግስት #መሪ