የመንግስቱ ኢኮኖሚ - መስጠት

እኛ የተፈጠርነው ለእግዚአብሄር ክብር ነው፡፡ የተፈጠርነው ሌሎችን ለማገልገል ነው፡፡ ገንዘብን መስጠት ገንዘብን እንደመስራት በጣም ወሳኝ የሆነ ልምምድ ነው፡፡

እግዚአብሄር የሚሰጠን ገንዘብ የምንበላውና የምንዘራው ነው፡፡

ለዘሪ ዘርን ለመብላትም እንጀራን በብዙ የሚሰጥ እርሱም የምትዘሩትን ዘር ይሰጣችኋል ያበረክትላችሁማል፥ የጽድቃችሁንም ፍሬ ያሳድጋል፤ 2ኛ ቆሮንቶስ 9፡10

እግዚአብሄር የሚሰጠን ገንዘብ ነፍሳችንንና ሌሎችን የምናገለግልበት ገንዘብ ነው፡፡ በእጃችን ያለው ገንዘብ የእኛ ብቻ አይደለም፡፡

በእጃቸን ያለው ገንዘብ ባለቤቶች ሳንሆን አስተዳዳሪዎች ነን፡፡ ለእግዚአብሄር ክብር እንደመፈጠራችን መጠን በእጃችን ያለው ገንዘብ እግዚአብሄር እንደወደደ እንደእግዚአብሄር ቃል ትእዛዝ የምናስረዳድር ደጋግ መጋቢዎች ነን፡፡

ልዩ ልዩን የእግዚአብሔርን ጸጋ ደጋግ መጋቢዎች እንደ መሆናችሁ፥ እያንዳንዳችሁ የጸጋን ስጦታ እንደ ተቀበላችሁ መጠን በዚያው ጸጋ እርስ በርሳችሁ አገልግሉ፤

እንደ ተሰጠንም ጸጋ ልዩ ልዩ ስጦታ አለን፤ . . .የሚሰጥ በልግስና ይስጥ፤ የሚገዛ በትጋት ይግዛ፤ የሚምር በደስታ ይማር። ሮሜ 12፡6፣8

በእጃችን ያለው ሁሉ የምንበላው አይደለም የምንሰጠውም እንጂ፡፡  

እግዚአብሔርን ከሀብትህ አክብር፥ ከፍሬህም ሁሉ በኵራት፤ ጐተራህም እህልን ይሞላል፥ መጥመቂያህም በወይን ጠጅ ሞልታ ትትረፈረፋለች። ምሳሌ 3፡9-10

ያለውን የሚበትን ሰው አለ፥ ይጨመርለታልም፤ ያለ ቅጥ የሚነፍግ ሰውም አለ፥ ይደኸያልም። ምሳሌ 11፡24

ሰው ደግሞ ብሰጥ ይጎድልብኛል ብሎ እንዳያስብ ስጥ ስለሰጠህ አይጎድልብህም ይሰጥሃል ተባለ፡፡

ስጡ ይሰጣችሁማል፤ በምትሰፍሩበት መስፈሪያ ተመልሶ ይሰፈርላችኋልና፥ የተጨቈነና የተነቀነቀ የተትረፈረፈም መልካም መስፈሪያ በእቅፋችሁ ይሰጣችኋል። ሉቃስ 6፡38

ስለዚህ ነው ከሚቀበል ይበልጥ የሚሰጥ የተባረከ ነው የሚለው፡፡

እንዲሁ እየደከማችሁ ድውዮችን ልትረዱና እርሱ ራሱ፦ ከሚቀበል ይልቅ የሚሰጥ ብፁዕ ነው እንዳለ የጌታን የኢየሱስን ቃል ልታስቡ ይገባችሁ ዘንድ በሁሉ አሳየኋችሁ። ሐዋርያት 20፡35

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #ብልፅግና #የብልፅግናወንጌል #ስራ #ትጋት #በረከት #ስኬት #ስምረት #መሰረታዊፍላጎት #ጥበብ #ሁሉየእናንተነውና #ቤተክርስትያን #አማርኛ #ስብከት #የተትረፈረፈህይወት #መፅሃፍቅዱስ #መድከም #አቢይ #አቢይዋቁማ #አቢይዋቁማዲንሳ

የመንግስቱ ኢኮኖሚ - በስራ መትጋት

በህይወት ለመሳካት ጥበብ ያስፈልገናል፡፡

በወርቅና በብር ከመነገድ ይልቅ በእርስዋ መነገድ ይሻላልና። ምሳሌ 3:14

መፅሃፍ ቅዱስ ደግሞ ለሰው ልጅ ስኬት የሚያስፈልገውን ጥበብ ሁሉ ይዞዋል፡፡ መፅሃፍ ቅዱስ የማይዳስሰው ለሰው አስፈላጊ የሆነ የህይወት ክፍል የለም፡፡

መፅሃፍ ቅዱስ ስለገንዘብ አያያዛችን ያስተምራል፡፡ መፅሃፍ ቅዱስ ገንዘብን እንዴት እንደምናገኝ ፣ ገንዘብን እንዴት እንደምናጠራቅም ፣ ገንዘብን እንዴት እንደምንሰጥና ገንዘብን እንዴት እንደምንጠቀም በጥበብ የተሞላ ነው፡፡

ምንም እንኳን የመጀመሪያው ጥሪያችን የእግዚአብሄርን መንግስትና ፅድቁን መፈለግ ቢሆንም እግረ መንገዳችንን ገንዘብ እናገኛለን፡፡ የመጀመሪያው ሙያችን ክህነት ቢሆንም በተሰማራንበት የስራ መስክ በምድር ላይ የሚያስፈልገንን ወጭ ለመሸፈን ገንዘብን እናገኛለን፡፡ እግረመንገዳችንን በትጋታችን የእግዚአብሄርን መልካምነትና ፀጋ ምስክር እንሆናለን፡፡

ባሪያዎች ሆይ፥ በቅን ልብ ጌታን እየፈራችሁ እንጂ፥ ለሰው ደስ እንደምታሰኙ ለታይታ የምትገዙ ሳትሆኑ፥ በሥጋ ጌቶቻችሁ ለሆኑ በሁሉ ታዘዙ። ለሰው ሳይሆን ለጌታ እንደምታደርጉ፥ የምታደርጉትን ሁሉ በትጋት አድርጉት፥ ከጌታ የርስትን ብድራት እንድትቀበሉ ታውቃላችሁና፤ የምታገለግሉት ጌታ ክርስቶስ ነውና። ቆላስይስ 3፡22-24

ይህም ብቻ አይደለም አንደኛው በውጭ ካሉት ዘንድ ክብርን የምናገኘበት አንዱ መንገድ ስራን በመስራት የራሳችንን ወጭ ራሳችን በመሸፈን ነው፡፡

ነገር ግን፥ ወንድሞች ሆይ፥ ከፊት ይልቅ ልትበዙ፥ በጸጥታም ትኖሩ ዘንድ ልትቀኑ፥ የራሳችሁንም ጉዳይ ልትጠነቀቁ፥ እንዳዘዝናችሁም፥ በውጭ ባሉት ዘንድ በአገባብ እንድትመላለሱ፥ አንዳችም እንዳያስፈልጋችሁ በእጃችሁ ልትሠሩ እንለምናችኋለን። 1ኛ ተሰሎንቄ 4፡10-12

የምናደርገውን ስራ ሁሉ በትጋት እንድናደርግ መፅሃፍ ቅዱስ ያዘናል፡፡

የታካች እጅ ችግረኛ ታደርጋለች፤ የትጉ እጅ ግን ባለጠጋ ታደርጋለች። ምሳሌ 10፡4

የታካች ሰው ነፍስ ትመኛለች፤ አንዳችም አታገኝም፤ የትጉ ነፍስ ግን ትጠግባለች። ምሳሌ 13፡4

ለመስራትና መድከም በህይወት ያለ ሰው እድልና ጥቅም እንደሆነና ይህንን እድል በሙላት እንድንጠቀምበት መፅሃፍ ቅዱስ ያስተምራል፡፡

አንተ በምትሄድበት በሲኦል ሥራና አሳብ እውቀትና ጥበብ አይገኙምና እጅህ ለማድረግ የምታገኘውን ሁሉ እንደ ኃይልህ አድርግ። መክብብ 9፡10

ከራሳችን አልፈን ለሌሎች መልካም ማድረግ የምንችለው ፣ በእግዚአብሄር መንግስት ላይ ሃብታችንን ማፍሰስ የምንችለውና የክርስቶስን ቤተክርስቲያን መገደፍ የምንችለው በትጋት ስንሰራ ነው፡፡ ተግተን ለመስራት ሃብትን ለማከማቸት ተባርከን ለበረከት እንድንሆን ጉልበትን የሚሰጠን እግዚአብሄር ይባረክ፡፡

ነገር ግን ዛሬ እንደ ሆነ ለአባቶችህ የማለውን ቃል ኪዳን ያጸና ዘንድ፥ ሀብት ለማከማቸት እርሱ ጉልበት ሰጥቶሃልና አምላክህን እግዚአብሔርን አስብ። ዘዳግም 8፡18

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #ብልፅግና #የብልፅግናወንጌል #ስራ #ትጋት #በረከት #ስኬት #ስምረት #መሰረታዊፍላጎት #ጥበብ #ሁሉየእናንተነውና #ቤተክርስትያን #አማርኛ #ስብከት #የተትረፈረፈህይወት #መፅሃፍቅዱስ #መድከም #አቢይ #አቢይዋቁማ #አቢይዋቁማዲንሳ

እምነት ጨምርልን

ሐዋርያትም ጌታን፦ እምነት ጨምርልን አሉት። ጌታም አለ፦ የሰናፍጭ ቅንጣት የሚያህል እምነት ቢኖራችሁ፥ ይህን ሾላ፦ ተነቅለህ ወደ ባሕር ተተከል ብትሉት፥ ይታዘዝላችሁ ነበር። ሉቃስ 17፡5-6

ለስጋችንና ለምስኪን እኔ አስተሳሰባችንን የሚመቹ ነገር ግን መፅሃፍ ቅዱሳዊ ያልሆኑ የፀሎት ርእሶች አሉ፡፡ ከእነዚህ መካከል እምነትን ጨምርልን የሚለው አንዱ ነው፡፡

ሃዋሪያት ኢየሱስን እምነትን ጨርልን ሲሉት "እሺ ተቀበሉ እምነትን እየጨመርኩላችሁ ነው" አላላቸውም፡፡ ኢየሱስ ያለው ያላችሁን ትንሽ የምትመስለውን እምነት ተጠቀሙ ስራ ስሩባት ለውጥን ታመጣለች ነው፡፡ ኢየሱስ የሚለው ነገራችሁን ለመለወጥ የሚያስፈልጋችሁ ያላችሁ ትንሽ የምትመስለው እምነት ብቻ ነች፡፡ ኢየሱስ የሚለው የሰናፍጭ ቅንጣት ያህል የሆነችውን እምነት መጠቀም አለባችሁ ለውጥ የሚመጣው በእርሱ ነው፡፡

የእምነት ትንሽ የለውም፡፡ እምነት ሁሉ ይሰራል፡፡ ያላችሁን እምነት ብትጠቀሙ ለውጥ ይመጣል፡፡ እምነት ጥቅም ላይ ሲውል ሁልጊዜ ታላቅን ስራን ይሰራል፡፡ የእምነት እርምጃን በመውሰድ ለውጥን ታያላችሁ፡፡

አንዳንድ ሰው የሚረካው በመለመን ብቻ ነው ፡፡ ባለው እምነት መጠቀም ፣ እርምጃ መውሰድ ፣ ስራ መስራትና ፍሬ ማፍራት አያውቅም፡፡ ስለዚህ በህይወቱ ለውጥን አያይም፡፡ ሰው የሚያስፈልገው አሁን ባለው እምነት መጠቀም ነው፡፡

ሐዋርያትም ጌታን፦ እምነት ጨምርልን አሉት። ጌታም አለ፦ የሰናፍጭ ቅንጣት የሚያህል እምነት ቢኖራችሁ፥ ይህን ሾላ፦ ተነቅለህ ወደ ባሕር ተተከል ብትሉት፥ ይታዘዝላችሁ ነበር። ሉቃስ 17፡5-6

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #እምነት #መናገር #አማርኛ #ስብከት #መዳን #መፅሃፍቅዱስ #ልብ #እምነት #ቃል #ማሰላሰል #ማድረግ #ሁሉይቻላል #ጥርጥር #አቢይ #አቢይዋቁማ #አቢይዋቁማዲንሳ #እወጃ #መናገር #ፅናት #ትግስት #መሪ

የምስክርነት ጥበብ

ምስክርነት በህይወታችን የቀመስነውን የኢየሱስ ክርስቶስን ነፃነት ለሌሎች የምናካፍልበት መንገድ ነው፡፡ ምስክርነት እጅግ ታላቅ ሃይል ያለው ስራ ነው፡፡ ምስክርነት ወይም ወንጌልን መስበክ ምን እንደሆነ ከመፅሃፍ ቅዱስ እንመልከት፡፡

1.      ምስክርነት ማስተማር አይደለም፡፡

ምስክርነት ወይም የወንጌል ስብከት ሰዎች ኢየሱስ በመስቀል ከላይ የከፈለላቸውን የሃጢያት ክፍያ ለእኔ ነው ብለው እንዲቀበሉ የእግዚአብሄርን ቃል ማስረዳት ነው፡፡ ስብከት መፅሃፍ ቅዱስን ማስተማር አይደለም፡፡ ስብከት የደህንነትን ቃል በመጥቀስ ሰዎች ጌታን ለመከተል እንዲወስኑ መርዳት ብቻ ነው፡፡

ኃጢአተኞችን ሊያድን ክርስቶስ ኢየሱስ ወደ ዓለም መጣ የሚለው ቃል የታመነና ሁሉ እንዲቀበሉት የተገባ ነው፤ 1ኛ ጢሞቴዎስ 1፡15

2.     ምስክርነት ሰው ዳግመኛ እንዲወለድ መርዳት ነው፡፡

ያልተወለደ ሰው መንግስቱን ሊያይና ሊገናነባት አይችልም፡፡ ስለዚህ ሰውን ትምህርት ከማስተማራችን በፊት ዳግመኛ እንዲወለድ መርዳት አለብን፡፡ ዳግመኛ የተወለደና የእግዚአብሄርን መንግስት የሚያይ ብቻ ነው የእግዚአብሄርን ቃል ትምህርት መማር የሚችለው፡፡ ሰው ዳግመኛ ከመወለዱ በፊት ለእርሱ የእግዚአብሄር መንፈስ ነገር ሞኝነት ነው፡፡

ኢየሱስም መልሶ፦ እውነት እውነት እልሃለሁ፥ ሰው ዳግመኛ ካልተወለደ በቀር የእግዚአብሔርን መንግሥት ሊያይ አይችልም አለው። ዮሃንስ 3፡3

ለፍጥረታዊ ሰው የእግዚአብሔር መንፈስ ነገር ሞኝነት ነውና አይቀበለውም፤ በመንፈስም የሚመረመር ስለ ሆነ ሊያውቀው አይችልም። 1ኛ ወደ ቆሮንቶስ ሰዎች 2፡14

3.     ምስክርነት ክርክርን ማሸነፍ አይደለም፡፡

ምስክርነት የመፅሃፍ ቅዱስ እውቀታችን የምናሳይበት መድረክ አይደለም፡፡ ምስክርነት በትህትና የመዳኛ መንገድን ለሰዎች የምናሳይበት መንገድ ነው፡፡ የመዳኛን እውቀት ከሰጣችሁ በኋላ ላለመቀበል ለመከራከር ከሚፈልግ ሰው ጋር ጊዜ ከማጥፋት ለሌላ ሰው መመስከር ይበልጥ ይጠቅማል፡፡

ነገር ግን ሞኝነት ካለው ምርመራና ከትውልዶች ታሪክ ከክርክርም ስለ ሕግም ከሚሆን ጠብ ራቅ፤ የማይጠቅሙና ከንቱዎች ናቸውና፤ ቲቶ 3፡9

4.     ምስክርነት ሰው ኢየሱስ ጌታ እንደሆነ እንዲመሰክር መርዳት ነው፡፡

ሰው በልቡ አምኖ ይፀድቃል በአፉ መስክሮ ይድናል፡፡ ምስክርነት እግዚአብሄር በኢየሱስ በኩል ያዘጋጀውን የመዳኛ መንገድ ማስቀበልና ኢየሱስ ለሃጢያታችን እንደሞተ በልብ በማመን ኢየሱስ ከሙታን እንደተነሳ በአፍ ማስመስከር ነው፡፡

ኢየሱስ ጌታ እንደ ሆነ በአፍህ ብትመሰክር እግዚአብሔርም ከሙታን እንዳስነሣው በልብህ ብታምን ትድናለህና፤ ሰው በልቡ አምኖ ይጸድቃልና በአፉም መስክሮ ይድናልና። ሮሜ 10፡9-10

5.     ምስክርነት ሰውን ማሳመን አይደለም፡፡

ምስክርነት የእግዚአብሄርን ቃል ማወጅ ነው፡፡ ያንን ቃል ተጠቅሞ አለምን የሚወቅሰው መንፈስ ቅዱስ ነው፡፡ ቃሉን የማወጅ ስራችንን ከተወጣን በኋላ ማረፍ አለብን እንጂ የመንፈስ ቅዱስን የማሳመን ስራ ለመስራት መሞከር የለብንም፡፡

እርሱም መጥቶ ስለ ኃጢአት ስለ ጽድቅም ስለ ፍርድም ዓለምን ይወቅሳል፤ ዮሃንስ 16፡8

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#እምነት #ወንጌል #ስብከት #ቃል #ዝራ #የምድርጨው #የአለምብርሃን #የአመፃገንዘብ #የእግዚአብሄርሃይል #መንፈስቅዱስ #ቃሉንመስማት #እወጃ #ቤተክርስትያን #አማርኛ #ስብከት #መዳን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ  

From Being A Desert To Becoming World Food Exporter; What Africa Can Lea...

ወንጌልን ለማካፈል የሚጠቅሙ ነጥቦች

ወንጌልን ለማካፈል የተወሰነ ቀመር የለውም፡፡ ሰው እግዚአብሄር ያደረገለትን በራሱ ቋንቋና መንገድ ሊመሰክር ይችላል፡፡ በአጠቃላይ ግን ወንጌልን ለሌሎች ለመመስከር የሚጠቅሙ አምስት ነጥቦችን ከመፅሃፍ ቅዱስ እንመልከት፡-

1.      እግዚአብሄር ሰውን የፈጠረው ፍፁም አድርጎ በመልኩና በአምሳሉ ነበር ፡፡

እግዚአብሔርም አለ፦ ሰውን በመልካችን እንደ ምሳሌአችን እንፍጠር፤ የባሕር ዓሦችንና የሰማይ ወፎችን፥ እንስሳትንና ምድርን ሁሉ፥ በምድር ላይ የሚንቀሳቀሱትንም ሁሉ ይግዙ። እግዚአብሔርም ሰውን በመልኩ ፈጠረ፤ በእግዚአብሔር መልክ ፈጠረው፤ ወንድና ሴት አድርጎ ፈጠራቸው። ዘፍጥረት 1፡26-27

2.     ሰው እግዚአብሄር አታድርግ ያለውን በማድረጉ ምክኒያት በአመፃው ከእግዚአብሔር ተለያየ፡፡

ሁሉ ኃጢአትን ሠርተዋልና የእግዚአብሔርም ክብር ጎድሎአቸዋል፤ ሮሜ 3፡23

3.     የሰውም መጥፋት የማይፈልግ እግዚአብሄር አለምን ካለምክኒያት እንዲሁ ስለወደደ ሃጢያት የማያውቀውን እንድ ልጁን ኢየሱስን ስለሃጢያታችን በመስቀል ላይ እንዲሞት ፈቀደ፡፡

ኃጢአተኞችን ሊያድን ክርስቶስ ኢየሱስ ወደ ዓለም መጣ የሚለው ቃል የታመነና ሁሉ እንዲቀበሉት የተገባ ነው፤ ከኃጢአተኞችም ዋና እኔ ነኝ፤ 1ኛ ጢሞቴዎስ 1፡15

በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለሙን እንዲሁ ወዶአልና። ዮሃንስ 3፡16

4.     ኢየሱስ በመስቀል ላይ የሃጢያት ዋጋችንን ሁሉ ከፍሎዋል፡፡

እኛ በእርሱ ሆነን የእግዚአብሔር ጽድቅ እንሆን ዘንድ ኃጢአት ያላወቀውን እርሱን ስለ እኛ ኃጢአት አደረገው። 2ኛ ቆሮንቶስ 5፡21

ስለ በደላችን አልፎ የተሰጠውን እኛን ስለ ማጽደቅም የተነሣውን ጌታችንን ኢየሱስን ከሙታን ባስነሣው ለምናምን ለእኛ ይቈጠርልን ዘንድ አለው። ሮሜ 4፡24-25

5.     ኢየሱስ ስለሃጢያትችን እንደሞተና የሃጢያት እዳችንን እንደከፈለ ሞትን ድል አድርጎ እንደተነሳ ብናምንና ኢየሱስ ጌታ እንደሆነ በአፋችን ብንመሰክር እንድናለን ፣¸እግዚአብሄር ልጅ አድርጎ ይቀበለናል ፣ የዘላለም ህይወት ይሰጠናል እንዲሁም ኢየሱስ በልባችን በመኖር በህይወት አሸናፊዎች ያደርገናል፡፡

ኢየሱስ ጌታ እንደ ሆነ በአፍህ ብትመሰክር እግዚአብሔርም ከሙታን እንዳስነሣው በልብህ ብታምን ትድናለህና፤ ሰው በልቡ አምኖ ይጸድቃልና በአፉም መስክሮ ይድናልና። ሮሜ 10፡9-10

ለተቀበሉት ሁሉ ግን፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን ሰጣቸው፤ ዮሃንስ 1፡12

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#እምነት #ወንጌል #ስብከት #ቃል #ዝራ #የምድርጨው #የአለምብርሃን #የአመፃገንዘብ #የእግዚአብሄርሃይል #መንፈስቅዱስ #ቃሉንመስማት #እወጃ #ቤተክርስትያን #አማርኛ #ስብከት #መዳን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ  

የዓመፃ ገንዘብ ሲያልቅ

እኔም እላችኋለሁ፥ የዓመፃ ገንዘብ ሲያልቅ በዘላለም ቤቶች እንዲቀበሉአችሁ፥ በእርሱ ወዳጆችን ለራሳችሁ አድርጉ። ሉቃስ 16:9

በእግዚአብሄር እይታ ለወንጌል ስራ ፣ ለእግዚአብሄር መንግስት ጥቅም የማይውል ማንኛውም ገንዘብ የአመፃ ገንዘብ ነው፡፡

በእግዚአብሄር እይታ ለእግዚአብሄር መንግስት ዋነኛ አላማ ለሆነው ሰዎችን የማዳን ስራ የማይውል ገንዘብ ሁሉ የአመፃ ገንዘብ ነው፡፡

ሰዎች ሁሉ ሊድኑና እውነቱን ወደ ማወቅ ሊደርሱ በሚወድ በእግዚአብሔር በመድኃኒታችን ፊት መልካምና ደስ የሚያሰኝ ይህ ነው። 1ኛ ጢሞቴዎስ 2፡3-4

ለዘላላማዊ ህይወት አላማ የማይጠቅም ማንኛውም ሃብት የአመፃ ገንዘብ ነው፡፡ ሰዎችን ለማዳን የማንጠቀምበት ለሰዎች ብርሃን ለመሆን የማንጠቀምበትና የምድር ጨው ለመሆን የማይጠቅመን ማንኛውም ሃብት የአመፃ ገንዘብ ነው፡፡

ለሰዎች መልካምን አድርጋላቸው በህይወታችን መስክረን የእግዚአብሄን መልካምነት አሳይተናቸው ለጌታ ለመማረክ የማይጠቅመን  ማንኛውም ገንዘብ የአመፃ ገንዘብ ነው፡፡

ራቁታችንን ወደምድር መጥተናል ራቁታችንንም እንመለሳለን፡፡ በምድር ላይ የምናገኘው ለእግዚአብሄር መንግስት ስራ የማይጠቅም ገንዘብ ሁሉ ከዘላለማዊ ህይወት አንፃር ከንቱ ገንዘብ ነው፡፡  

በምድር ያከማቸነው በመልካም ስራ ወደ መንግስተ ሰማያት የማንልከው ገንዘብ ጥለነው የምንሄደው ገንዘብ ሁሉ የአመፃ ገንዘብ ነው፡፡

እውነተኛውን ሕይወት ይይዙ ዘንድ፥ ለሚመጣው ዘመን ለራሳቸው መልካም መሠረት የሚሆንላቸውን መዝገብ እየሰበሰቡ፥ መልካምን እንዲያደርጉ በበጎም ሥራ ባለ ጠጎች እንዲሆኑ፥ ሊረዱና ሊያካፍሉም የተዘጋጁ እንዲሆኑ ምከራቸው። 1ኛ ጢሞቴዎስ 6፡18-19

በመልካም ስራ ያልመነዘርነው ገንዘብ በመልካም ስራ ባለጠጋ ያላደረገን ገንዘብ በብር ተከምሮ ያለ ገንዘብ የአመፃ ገንዘብ ነው፡፡

ብልና ዝገት በሚያጠፉት ሌቦችም ቆፍረው በሚሠርቁት ዘንድ ለእናንተ በምድር ላይ መዝገብ አትሰብስቡ፤ ነገር ግን ብልም ዝገትም በማያጠፉት ሌቦችም ቆፍረው በማይሠርቁት ዘንድ ለእናንተ በሰማይ መዝገብ ሰብስቡ፤ ማቴዎስ 6፡19-20

ልባችንን ወደ ሰማይ የማይስበን ገንዘብን ፣ ልባችንን ወደ ምድር የሚስበን ገንዘብና ልባችንን ወደ ሰማይ እንዳናተኩር የማያደርገን ገንዘብ የአመፃ ገንዘብ ነው፡፡

ነገር ግን ብልም ዝገትም በማያጠፉት ሌቦችም ቆፍረው በማይሠርቁት ዘንድ ለእናንተ በሰማይ መዝገብ ሰብስቡ፤ መዝገብህ ባለበት ልብህ ደግሞ በዚያ ይሆናልና። ማቴዎስ 6፡20-21

ሰዎችን ለዘላለም ህይወት የማንማርክበት ፣ ምድር ላይ ጥለነው የምንሄደው ፣ በመሬት ስበት ምክኒያት ወደሰማይ ይዘነው የማንሄደው ፣ በምድር ላይ ብቻ በዘላለማዊ ሃብት የምንመነዝረውና በምድር ላይ ብቻ ዋጋ ያለው ገንዘብ ሁሉ የአመፃ ገንዘብ ነው፡፡

እኔም እላችኋለሁ፥ የዓመፃ ገንዘብ ሲያልቅ በዘላለም ቤቶች እንዲቀበሉአችሁ፥ በእርሱ ወዳጆችን ለራሳችሁ አድርጉ። ሉቃስ 16:9

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#እምነት #ወንጌል #ስብከት #ቃል #ዝራ #የምድርጨው #የአለምብርሃን #የአመፃገንዘብ #የእግዚአብሄርሃይል #መንፈስቅዱስ #ቃሉንመስማት #እወጃ #ቤተክርስትያን #አማርኛ #ስብከት #መዳን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ