ሰዎችን የምንቆጣጠርበት ስድስት መንገዶች

እግዚአብሄር ሰውን የፈጠረው በመልኩና በአምሳሉ ነው፡፡ እግዚአብሄር እሺ እና እምቢ የሚልበት የራሱ ነፃ ፈቃድ እንዳለው ሁሉ ሰውን ነፃ ፈቃድ አለው፡፡ ሰው ፈቃዱን ተጠቅሞ ሊያምፅበት እንደሚችል ቢያውቅም እግዚአብሄር በቸርነቱ ሰውን ነጻ ፈቃድ ያለው አድርጎ ፈጠረው፡፡ ሰው ፈቃዱን ተጠቅሞ ሃጢያት ቢሰራም እንኳን እግዚአብሄር የሰውን ነጻ ፈቃድ አልነጠቀውም፡፡ የሰውን ነፃ ፈቃድ መግፋት የእግዚአብሄርን አሰራር መጋፋት ነው፡፡

የእግዚአብሄር መንፈስ ይመክራል እንጂ አይጫንም፡፡ የእግዚአብሄር መንፈስ ይመራል እንጂ አይነዳም፡፡ የእግዚአብሄር መንፈስ ፈቃዳችንን እንድንሰጠው ይጠይቃል እንጂ በርግዶ አይገባም፡፡

ነገር ግን የሰው ስጋዊ ፍላጎት እንደዚግህ አይደለም፡፡ የሰው ስጋዊ ፍላጎት ሌላውን ሰው መቆጣጠር እና ሁኔታዎችን መቆጣጠር ይፈልጋል፡፡ ማመንና መጠበቅ ለስጋ የማይመቸው ነገር ነው፡፡ ለስጋ በእግዚአብሄር ጊዜ መተማን አይሆንለትም፡፡ ስጋ በራሱ ጉልበት ይተማመናል፡፡ ፡፡  

ስጋ ለሌሎች ነጻነትን መስጠት አይፈልግም፡፡ ስጋ ሌሎችን መቆጣጠር ይፈልጋል፡፡ ስጋ ሌሎችን ካለአግባብ የሚቆጣጠርበትን መንገዶች ከእግዚአብሄር ቃል እንመልከት፡፡   

1.      ውሸት

ሰው እውነትን ማወቅ መብቱ ነው፡፡ ሰው በህይወቱ ላይ ትክክለኛውን ውሳኔ ለመወሰን እውነት ያስፈልገዋል፡፡ ነፃ የሚያወጣው እውነት ነው፡፡ እውነትን መደበቅ ሰውን በእስራት ውስጥ ማቆየት ነው፡፡ እውነትን መደበቅና ውሸትን እንደ እውነት አድርጎ ማቅረብ የስጋ የመቆጣጠሪያ አንዱ መንገድ ነው፡፡ ውሸትን መናገር የሰውን ህይወት እኛ ወደምንፈልግው አቅጣጫ ለመመራት የምናደርገው የራስ ወዳድነት ስጋዊ ድርጊት ነው፡፡

ስለዚህ ውሸትን አስወግዳችሁ፥ እርስ በርሳችን ብልቶች ሆነናልና እያንዳንዳችሁ ከባልንጀሮቻችሁ ጋር እውነትን ተነጋገሩ። ወደ ኤፌሶን ሰዎች 4፡25

2.     ክርክር

የምናውቀውን እውቀት ለሰው ማካፈል ተገቢ ነው፡፡ ነገር ግን ሰውን በግድ ለማሳመን መሞከር ሰውን የምንቆጣርነት የስጋ ስራ ነው፡፡ ስጋ በሚናገረው ቃል አይተማመንም፡፡ ስጋ የሚታመነው በጉልበቱ ነው፡፡ ስጋ በባህሪው አይተማነምንም፡፡ ስጋ የሚተማመነው በጉልበት ነው፡፡ ስጋ በመተማመን አያምንም ስጋ የሚያምነው በማስገደድ ነው፡፡ ስጋ የሌላውን ጥቅም ስለማይፈልግ ያለው አንድ አማራጭ ጉልበትን ተጠቀሞ ማስገደድ ብቻ ነው፡፡

ስለዚህ ነው መንፈሳዊ መሪ ስጋዊ የሰዎችን ፈቃድ የሚያከብር ትሁትና የማይከራከር የግሉን ፍላጎት ሰዎች ላይ በግድ የማይጭን ሊሆን እንደሚገባው የሚመክረው፡፡

የማይሰክር፥ የማይጨቃጨቅ ነገር ግን ገር የሆነ፥ የማይከራከር፥ ገንዘብን የማይወድ፥ 1ኛ ወደ ጢሞቴዎስ 3፡3

3.     ስድብ

ስድብ ሌላውን ሰው ዝቅ ማድረግ በው፡፡ ስጋ እርሱ ከፍ እንዲል ሌሎች ሰዎች ዝቅ ማለት ያለባቸው ይመሰለዋል፡፡ ስድብ ሌላውን ማዋረድ ነው፡፡

ክፉን በክፉ ፈንታ ወይም ስድብን በስድብ ፈንታ አትመልሱ በዚህ ፈንታ ባርኩ እንጂ፥ በረከትን ልትወርሱ ለዚህ ተጠርታችኋልና። 1ኛ የጴጥሮስ መልእክት 3፡9

4.     ቁጣ

ቁጣ ድምፅን ከፍ በማድረግ ሌላው ላይ ክፉ ተፅእኖ ማድረግ ነው፡፡ ሰው ማደረግ ባይፈልግም በቁጣችን ደንግጦ የማይፈልገውን ነገር እንዲያደርግ ማስገደድ ክፋት ነው፡፡  

አሁን ግን እናንተ ደግሞ ቍጣንና ንዴትን ክፋትንም፥ ከአፋችሁም ስድብን የሚያሳፍርንም ንግግር እነዚህን ሁሉ አስወግዱ፤ ወደ ቆላስይስ ሰዎች 3፡8

5.     ምሬት እና ይቅር አለማለት

ሌላው ሰውን ያለአግባብ ለመቆጣጠር የምንፈልግበት መንገድ ምሬትና ይቅር አለማለት ነው፡፡ የበደለንን ሰው አለመልቀቅ የበደለን ሰው እንዳይከናወንለት መመኘት የበደለን ሰው እንዳይሳካለት ማሰብና መናገር ሌላኛው ሌላውን ሰው የምንቆጣጠርበት ክፉ መንገድ ነው፡፡ ይቅር ማለት ሰውን መልቀቅና መተው ለስጋ አርነት አለመስጠት ነው፡፡

እርስ በርሳችሁ ትዕግሥትን አድርጉ፥ ማንም በባልንጀራው ላይ የሚነቅፈው ነገር ካለው፥ ይቅር ተባባሉ፤ ክርስቶስ ይቅር እንዳላችሁ እናንተ ደግሞ እንዲሁ አድርጉ፤ ወደ ቆላስይስ ሰዎች 3፡13

6.     መሃላ

መሃላ በንግግር ብዛት ሰው የማይፈልገውን ነገር እንዲያደርግ የማስገደጃ የስጋ ጥበብ ነው፡፡ መሃላ ነገርን ሃይማኖታዊ በማስመሰል ሊያምነን ያልፈለገው ሰው እንዲያምንን የምንጫንበት ክፉ የስጋ መንገድ ነው፡፡

እኔ ግን እላችኋለሁ፦ ከቶ አትማሉ፤ በሰማይ አይሆንም የእግዚአብሔር ዙፋን ነውና፤ በምድርም አይሆንም የእግሩ መረገጫ ናትና፤ በኢየሩሳሌምም አይሆንም የታላቁ ንጉሥ ከተማ ናትና፤ በራስህም አትማል፥ አንዲቱን ጠጉር ነጭ ወይም ጥቁር ልታደርግ አትችልምና። ነገር ግን ቃላችሁ አዎን አዎን ወይም አይደለም አይደለም ይሁን፤ ከነዚህም የወጣ ከክፉው ነው። የማቴዎስ ወንጌል 5፡34-37

አቢይ ዋቁማ ዲንሳ Abiy Wakuma Dinsa

ለተጨማሪ ፅሁፎች https://www.facebook.com/abiy.wakuma/notes

#ኢየሱስ #ጌታ #ውሸት #ሀሰት #ምሬት #ይቅርአለማለት #ቁጣ #መሃላ #ክርክር #ስድብ #ቁጣ #ውሸት ##ሰይጣን #ዲያቢሎስ #ጠላት #ማታለል #ቤተክርስትያን #አማርኛ #ስብከት #መዳን #መፅሃፍቅዱስ #ሰላም #አቢይ #አቢይዋቁማ #አቢይዋቁማዲንሳ #እወጃ #መናገር #ፅናት #ትግስት #መሪ

ውሸታም ነው

እናንተ ከአባታችሁ ከዲያብሎስ ናችሁ የአባታችሁንም ምኞት ልታደርጉ ትወዳላችሁ። እርሱ ከመጀመሪያ ነፍሰ ገዳይ ነበረ፤ እውነትም በእርሱ ስለ ሌለ በእውነት አልቆመም። ሐሰትን ሲናገር ከራሱ ይናገራል፥ ሐሰተኛ የሐሰትም አባት ነውና። የዮሐንስ ወንጌል 8፡44

ሰይጣን ሲጀመር የሰው ልጆችን ያሳተው በውሸት ነው፡፡ ሰይጣን አሁንም ከውሸት ውጭ አንድም እውነት የለውም፡፡

እባብም ለሴቲቱ አላት፦ ሞትን አትሞቱም፤ ከእርስዋ በበላችሁ ቀን ዓይኖቻችሁ እንዲከፈቱ እንደ እግዚአብሔርም መልካምንና ክፉን የምታውቁ እንድትሆኑ እግዚአብሔር ስለሚያውቅ ነው እንጂ። ኦሪት ዘፍጥረት 3፡4-5

ሰይጣን ውሸታም ነው፡፡ ሰይጣን ስልጣን የለውም፡፡ ሰይጣን በኢየሱስ የመስቀል ስራ ፈፅሞ ተሸንፎዋል፡፡

በእኛ ላይ የነበረውን የሚቃወመንንም በትእዛዛት የተጻፈውን የዕዳ ጽሕፈት ደመሰሰው፤ እርሱንም በመስቀል ጠርቆ ከመንገድ አስወግዶታል፤ አለቅነትንና ሥልጣናትን ገፎ፥ ድል በመንሣት በእርሱ እያዞራቸው በግልጥ አሳያቸው። ወደ ቆላስይስ ሰዎች 2፡14-15

ሰይጣን የተሸነፈ ጠላት ነው፡፡ ሰይጣን የተሻረ ጠላት ነው፡፡

እንግዲህ ልጆቹ በሥጋና በደም ስለሚካፈሉ፥ እርሱ ደግሞ በሞት ላይ ሥልጣን ያለውን በሞት እንዲሽር፥ ይኸውም ዲያብሎስ ነው፥ በሕይወታቸውም ሁሉ ስለ ሞት ፍርሃት በባርነት ይታሰሩ የነበሩትን ሁሉ ነጻ እንዲያወጣ፥ በሥጋና በደም እንዲሁ ተካፈለ። ወደ ዕብራውያን 2፡14-15

ሰይጣን ስልጣኑ ስለተገፈፈ ያለው አንድ አማራጭ መዋሸት ነው፡፡

እግዚአብሔርን እንዲህ በሉት፦ ሥራህ ግሩም ነው፤ ኃይልህ ብዙ ሲሆን ጠላቶች ዋሹብህ። መዝሙረ ዳዊት 66፡3

ውሸቱን ካልተቀበልነው ሰይጣም አይሳካለትም፡፡ ውሸቱን ከላመንነው ሰይጣን በህይወታችን ስፍራ የለውም፡፡ ውሸቱን ካላመንነው ሰይጣን የመስረቅ የማረድና የማጥፋት ተልእኮውን በህይወታችን ሊፈፅም አይችልም፡፡

ሌባው ሊሰርቅና ሊያርድ ሊያጠፋም እንጂ ስለ ሌላ አይመጣም፤ እኔ ሕይወት እንዲሆንላቸው እንዲበዛላቸውም መጣሁ። የዮሐንስ ወንጌል 10፡10

አቢይ ዋቁማ ዲንሳ Abiy Wakuma Dinsa

ለተጨማሪ ፅሁፎች https://www.facebook.com/abiy.wakuma/notes

#ኢየሱስ #ጌታ #ውሸት #ሀሰት #ሰይጣን #ዲያቢሎስ #ጠላት #ማታለል #ቤተክርስትያን #አማርኛ #ስብከት #መዳን #መፅሃፍቅዱስ #ሰላም #አቢይ #አቢይዋቁማ #አቢይዋቁማዲንሳ #እወጃ #መናገር #ፅናት #ትግስት #መሪ

የመልካም ነገር ጀማሪ

በእናንተ መልካምን ሥራ የጀመረው እስከ ኢየሱስ ክርስቶስ ቀን ድረስ እንዲፈጽመው ይህን ተረድቼአለሁና፤ ወደ ፊልጵስዩስ ሰዎች 1፡6

በህይወታችሁ ምንም መልካም ነገር ካያችሁ እግዚአብሄር ስለጀመረው ብቻ ነው፡፡ ሰው በሰውነቱ በራሱ የሚጀምረው መልካም የእግዚአብሄር ነገር የለም፡፡

ኢየሱስም፦ ስለ ምን ቸር ትለኛለህ? ከአንዱ ከእግዚአብሔር በቀር ቸር ማንም የለም። የማርቆስ ወንጌል 10፡18

እውነተኛ መልካም ነገር በህይወታችሁ ካለ እግዚአብሄር ጀምሮታል ከእግዚአብሄ ተቀብላችሁታል፡፡ ለመልካም ነገር ልባችን ከተነሳሳ በምንም ነገር ስለበለጥን ይሆን እግዚአብሄር ልባችንን ስላነሳሳ እግዚአብሄር ስላቀበለን ነው፡፡  

አንተ እንድትበልጥ ማን አድርጎሃል? ያልተቀበልኸውስ ምን አለህ? የተቀበልህ ከሆንህ ግን እንዳልተቀበልህ የምትመካ ስለ ምንድር ነው? 1ኛ ወደ ቆሮንቶስ ሰዎች 4፡7

እግዚአብሄር በህይወታችሁ መልካም ነገር ማድርግ ሲፈልግ ሃሳብን ይበእኛ ውስጥ ይዘራል፡፡ እግዚአብሄር በነገሮች ከመባረኩ በፊት ለነገሮች ባለ መነሳሳት ይባርካችኋል፡፡ እግዚአብሄር በምንም ነገር ከመባረኩ በፊት የሚባርካችሁ በመሳሳት ነው፡፡

የእግዚአብሄር የመጀመሪያ በረከት መነሳሳት ነው፡፡ በውስጣችሁ አስባችሁ የማታውቁትን ሃሳብ የሚሰጣችሁ እግዚአብሄር ነው፡፡ ይቻላል ብላችሁ አስባችሁ የማታውቁትን ነገር እንደሚቻል ድፍረትን የሚሰጣችሁ እግዚአብሄር ነው፡፡

የረሳችሁት ወይም አስባችሁ የማታውቁትን ሃሳብ ይቻላል ብሎ ያነሳሳችኋል፡፡ ኢየሱስ ክርስቶስን የተቀበልን ሁላችን የእግዚአብሄር መንፈስ በውስጣችን ይኖራል፡፡ በውስጣችን የሚኖረው የእግዚአብሄር ህይወት በህይወታች ሊሰራ ያለውን ነገር ለመስራት ሲንቀሳቀስ ልባችንን ያነሳሳል አብረነውም እንንቀሳቀሳለን፡፡

ስለዚህ ነው ሰው መጨነቅ የሌለበት፡፡ እግዚአብሄር የህይወታችን ባለቤት ነው፡፡ እኛ ብንምተወው እንኳን የእግዚአብሄን ነገር እንፈልግ እንጂ እግዚአብሄር አይተወውም፡፡  በህይወታችን ያለው አላማ መፈፀም እኛ ከምንፈልገውና እኛን ከሚጠቅመው በላይ እግዚአብሄር ይፈልገዋል እግዚአብሄርን ይጠቅመዋል፡፡

እግዚአብሄር መሪ ነው፡፡ እግዚአብሄር ጀማሪ ነው፡፡ እግዚአብሄር ባለቤት ነው፡፡

አቢይ ዋቁማ ዲንሳ Abiy Wakuma Dinsa

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

#የእግዚአብሄርምክር #የእግዚአብሔርፈቃድ #እግዚአብሔር #ህብረት #እምነት #የሰውአሳብ #ቤተክርስትያን #አማርኛ #ስብከት #መዳን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ  

እግዚአብሄር ጀማሪ ነው

እግዚአብሄር በማንም አይመራም፡፡ እግዚአብሄርን ማንም አያስታውሰውም፡፡ እግዚአብሄርን ማንም አያማክረውም፡፡

እግዚአበሄር የሚሰራውን ያውቃል፡፡ እግዚአብሄር ስለሚሆነው ነገር ሙሉ እውቀት አለው፡፡ እግዚአብሄር ነገር ከየት ጀምሮ የት እንደሚጨርስ መጀመሪያውንና መጨረሻውን ያውቃል፡

እኔ አምላክ ነኝና፥ ሌላም የለምና የቀድሞውን የጥንቱን ነገር አስቡ፤ እኔ እግዚአብሔር ነኝ እንደ እኔም ያለ ማንም የለም። በመጀመሪያ መጨረሻውን፥ ከጥንትም ያልተደረገውን እነግራለሁ፤ ምክሬ ትጸናለች ፈቃዴንም ሁሉ እፈጽማለሁ እላለሁ። ትንቢተ ኢሳይያስ 46፡9-10

እግዚአብሄር ምድርንና ሰማይን ከመፍጠሩ በፊት ምድርና ሰማይን ለመፍጠር ፈለገ ፣ አቀደና ፈጠረ፡፡

እግዚአብሄር ሰውን ከመፍጠሩ በፊት እንደ ሰው አይነት ፣ ሰው እንደሚሰራው አይነትን ስራ የሚሰራ ፍጡር መፍጠር ፈለገ፡፡ እግዚአብሄር ሰውን በመልኩና በአምሳሉ ፈጠረ፡፡

ሰው አግዚአብሄር አታድርግ ያለውን በማድረግ ሰው ከእርሱ ከተለያየ በኋላ እግዚአብሄር ህዝብ ይሆነው ዘንድ አብርሃም መረጠና ጠራው፡፡

እግዚአብሄር ከአብርሃም ከይስሃቅና ከያቆብ ዘር የእስራኤልን ህዝብ ለራሱ መረጠ፡፡ እግዚአብሄር የእስራኤልን ህዝብ ከግብፅ ምድር በማውጣት ለራሱ የተለየ ህዝብን አደረገ፡፡  

እግዚአብሄር ያቀደው ጊዜ በደረሰ ጊዜ በእስራኤል ህዝብ በኩል አህዛብ ሁሉ የሚባረኩበትን ኢየሱስን አመጣ፡፡

 ነገር ግን የዘመኑ ፍጻሜ በደረሰ ጊዜ እግዚአብሔር ከሴት የተወለደውን ከሕግም በታች የተወለደውን ልጁን ላከ፤ ወደ ገላትያ ሰዎች 4፡4

እግዚአብሄር ኢየሱስን ለተቀበሉ ሰዎች ሁሉ ለእያንዳንዳቸው የተለየ የህይወት እቅድ አለው፡፡ እግዚአብሄር ለልጆቹ ማንም እቅድ እንዲያቀብለው አይጠብቅም፡፡ እግዚአብሄር ጀማሪ አምላክ ነው፡፡ እግዚአብሄር ምን እንደሚያደርግ ያውቃል፡፡ ከመፈጠራችን በፊት የምንሰራው ነገር ተዘጃግጅቶ አልቆ ነበር፡፡ የተፈጠርንውም የምንሰራው ነገር ስለነበር ነው፡፡

እኛ ፍጥረቱ ነንና፤ እንመላለስበት ዘንድ እግዚአብሔር አስቀድሞ ያዘጋጀውን መልካሙን ሥራ ለማድረግ በክርስቶስ ኢየሱስ ተፈጠርን። ወደ ኤፌሶን ሰዎች 2፡10

እግዚአብሄር ለህይወታችን ያለውን እቅድ በትጋት እየሰራበት ነው፡፡ ከእኛ የሚጠበቀው አንድ ነገር እግዚአብሄር ባወጣው እቅድ ውስጥ መግባት ለመግባት የእግዚአብሄርን ፊት መፈለግ ብቻ ነው፡፡ እግዚአብሄር የሚለውን መከተልና ማድረግ ለሰው በቂ ነው፡፡  

እግዚአብሄር በህይወታችን ያለውን አላማ ለመፈፀም ለነገሮች ልባችንን ያነሳሳል፡፡ እግዚአብሄር በህይወታችን ያቀደው የህይወት አላማ መፈፀሚያው ጊዜ ሲደርስ እኛ እንኳን የረሳነውን ነገር እንደገና ይቆሰቁሳል ልባችንን ያነሳሳል፡፡ ሰው ረስቶታል ብሎ እግዚአብሄር የሚተወው ነገር የለም፡፡ እግዚአብሄር አላማው እስኪፈፅም አያርፍም፡፡  

እግዚአብሄር ፈጣሪ ነው፡፡ እግዚአብሄር ጀማሪ አምላክ ነው፡፡ እግዚአብሄር ፈር ቀዳጅ ነው፡፡ እግዚአብሄር ግድ የሚለው ባለቤት ነው፡፡ መልካምን ነገር በማሰብ እግዚአብሄርን ማንም አይቀድመውም፡፡

ለእናንተ የማስባትን አሳብ እኔ አውቃለሁ፤ ፍጻሜና ተስፋ እሰጣችሁ ዘንድ የሰላም አሳብ ነው እንጂ የክፉ ነገር አይደለም። ትንቢተ ኤርምያስ 29፡11

እግዚአብሄር በህይወታችን ያለውን አላማ ሊፈፅም በዝምታም ይሁን በዝግታ በመስራት ይተጋል፡፡ እኛ ስንተኛ ሁሉ እግዚአብሄር በትጋት በስራ ላይ ነው፡፡

ስለዚህ ነው እረፉ እኔም አምላክ እንደሆንኩ እወቁ የሚለው፡፡

እረፉ እኔም አምላክ እንደሆንኩ ዕወቁ፡፡ መዝሙረ ዳዊት 46:10

አቢይ ዋቁማ ዲንሳ Abiy Wakuma Dinsa

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

#የእግዚአብሄርምክር #የእግዚአብሔርፈቃድ #እግዚአብሔር #ህብረት #እምነት #የሰውአሳብ #ቤተክርስትያን #አማርኛ #ስብከት #መዳን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ  

በህይወታችን ዘመን መለወጡን የምናውቅባቸው አምስት መንገዶች

በህይወታችን ዘመን መለወጡን የምናውቅባቸው አምስት መንገዶች

ለሁሉ ዘመን አለው፥ ከሰማይ በታችም ለሆነ ነገር ሁሉ ጊዜ አለው። ለመወለድ ጊዜ አለው፥ ለመሞትም ጊዜ አለው፤ ለመትከል ጊዜ አለው፥ የተተከለውንም ለመንቀል ጊዜ አለው፤ ለመግደል ጊዜ አለው፥ ለመፈወስም ጊዜ አለው፤ ለማፍረስ ጊዜ አለው፥ ለመሥራትም ጊዜ አለው፤ ለማልቀስ ጊዜ አለው፥ ለመሳቅም ጊዜ አለው፤ ዋይ ለማለት ጊዜ አለው፥ ለመዝፈንም ጊዜ አለው፤ ድንጋይን ለመጣል ጊዜ አለው፥ ድንጋይንም ለመሰብሰብ ጊዜ አለው፤ ለመተቃቀፍ ጊዜ አለው፥ ከመተቃቀፍም ለመራቅ ጊዜ አለው፤ ለመፈለግ ጊዜ አለው፥ ለማጥፋትም ጊዜ አለው፤ ለመጠበቅ ጊዜ አለው፥ ለመጣልም ጊዜ አለው፤ ለመቅደድ ጊዜ አለው፥ ለመስፋትም ጊዜ አለው፤ ዝም ለማለት ጊዜ አለው፥ ለመናገርም ጊዜ አለው፤ ለመውደድ ጊዜ አለው፥ ለመጥላትም ጊዜ አለው፤ ለጦርነት ጊዜ አለው፥ ለሰላምም ጊዜ አለው። ነገርን ሁሉ በጊዜው ውብ አድርጎ ሠራው፤ መጽሐፈ መክብብ 3፡1-8፣11

እግዚአብሄር ነገሮችን የሚሰራው በዘመን ውስጥ ነው፡፡ እያንዳንዳችን የተወሰነልን የምናልፈበት ዘመንና ጊዜ አለ፡፡ አንድ ዘመን ተፈጽሞ ሌላው ሲጀመር ማወቅ ራሳችንን ከሚመጣው ዘመን ጋር አስተካክለን እንድናሰለፍና እንድናስተካከል ያዘጋጀናል፡፡ አንዱ የህይወት ምእራፋችን መዘጋቱና የተወሰነው ዘመን እንዳለቀ ማወቅ ባለፈው ዘመን ላይ እንዳንቆይ እና ባለቀና በተለወጠ ዘመን ላይ ጉልበታችንን እንዳናባክን ይረዳናል፡፡ አዲስ የህይወት ምእራፍ መከፈቱን ማወቅ ከአዲሱ የህይወት ምእራፍ ጋር ራሳችንን በትክክል አስተካክለን እንድናሰልፍ ያስችለናል፡፡

ምሳሌውንም ከበለስ ተማሩ፤ ጫፍዋ ሲለሰልስ ቅጠልዋም ሲያቈጠቍጥ፥ ያን ጊዜ በጋ እንደ ቀረበ ታውቃላችሁ፤ የማቴዎስ ወንጌል 24፡32

በህይወታችን ዘመን ሲለወጥ እግዚአብሄር በቀንና በሰአት ባይመራንም ዘመን መለወጡን የምናውቅባቸውን መንገዶች እንመልከት

1.      በጣም ለምንወደው እና አድርገን ለማንጠግበው ነገር ፍላጎት ስናጣ

2.     ህይወታችን በተለየ ሁኔታ ለሌላ ነገር ሲጠማና ሲራብ

3.     ለነበረን የህይወት ሃላፊነት ሸክም እና ትእግስት ስናጣ

4.     አሁን በምናደርገው ላይ ልባችን ሳይኖር ሲቀር ልባችን ከነገሩ ላይ ሲነሳ

5.     የምናደርገው ነገር ከባድ ተራራ መግፋት ሲሆን

እነዚህና እንዚህን የመሳሰሉ ምልክቶች በህይወታችን ካየን በህይወታችን ዘመን እየተለወጠ መሆኑን አመላካቾች ሊሆኑ ይችላሉ፡፡ ለእግዚአብሄር የመንፈስ የውስጥ ምስክርነት እና ምሪት ማረጋገጫ የሆኑትን እነዚህን ምልክቶች ካየን ለሚቀጥለው የህይወት ምእራፋችን መዘጋጀት ግድ ይላል፡፡

ውዴ እንዲህ ብሎ ተናገረኝ፦ ወዳጄ ሆይ፥ ተነሺ ውበቴ ሆይ፥ ነዪ። እነሆ፥ ክረምት አለፈ፥ ዝናቡም አልፎ ሄደ። አበቦች በምድር ላይ ተገለጡ፥ የዜማም ጊዜ ደረሰ፥ የቊርዬውም ቃል በምድራችን ተሰማ። በለሱ ጐመራ፥ ወይኖችም አበቡ መዓዛቸውንም ሰጡ፤ ወዳጄ ሆይ፥ ተነሺ፤ ውበቴ ሆይ፥ ነዪ። መኃልየ መኃልይ ዘሰሎሞን 2፡10-13

አቢይ ዋቁማ ዲንሳ Abiy Wakuma Dinsa

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

#ኢየሱስ #ጌታ #ጊዜ #ዘመን #ውብ #ፀጋ #ጥበብ #ቤተክርስትያን #አማርኛ #ስብከት #መዳን #መጐብኘትሽ #አላወቅሽም #መፅሃፍቅዱስ #ሰላም #ወንጌል #ዛሬ #ነገ #ትላንት #መሪ #አቢይ #አቢይዋቁማ #አቢይዋቁማዲንሳ

እግዚአብሄር ብቻ ሊሞላው የሚችለው ክፍት ቦታ

ሰው የተፈጠረው ለእግዚአብሄር ክብር ነው፡፡ ሰው የተፈጠረው ከእግዚአብሄር ጋር ህብረት እያደረገ እንዲኖው ነው፡፡

የመጀመሪያው ሰው አዳም እግዚአብሄርን ባለመታዝዝ ከእግዚአብሄር ተለየ፡፡ ሰው ከእግዚአብሄር ሲለይ ከህይወቱ ተለየ፡፡ ሰው ከእግዚአብሄር ሲለይ ከአላማው ተለየ፡፡ ሰው ከእግዚአብሄር ሲለይ ከክብሩ ተለየ፡፡ ሰው ከእግዚአብሄር ሲለይ ከህይወት ትርጉሙ ተለየ፡፡

ሁሉ ኃጢአትን ሠርተዋልና የእግዚአብሔርም ክብር ጎድሎአቸዋል፤ ወደ ሮሜ ሰዎች 3፡23

ሰው የተፈጠረው ከእግዚአብሄር ተለይቶ እንዲኖር ባለመሆኑ ሰው ከእግዚአብሄር ሲለይ በህይወቱ ትልቅ ከፍተት ተፈጠረ፡፡

አሁን በምድር ላይ የምታዩት ረብሻ ሁሉ ሰው ያንን እግዚአብሄር ብቻ ሊሞላው የሚችለውን ክፍተት በተለያየ ነገር ለመሙላት በሚያደርገው ጥረት የሚፈጠር ረብሻ ነው፡፡

ሰላምን እተውላችኋለሁ፥ ሰላሜን እሰጣችኋለሁ፤ እኔ የምሰጣችሁ ዓለም እንደሚሰጥ አይደለም። ልባችሁ አይታወክ አይፍራም። የዮሐንስ ወንጌል 14፡27

ሰው እግዚአብሄር ብቻ ሊሞላው የሚችለውን ክፍተት በዝና ሊሞላው ሲሞክር ዝናውን ባገኘው መጠን እየጠላው ይሄዳል፡፡ ሰው በእግዚአብሄር ብቻ ሊሞላ የሚችለውን የህይወቱን ክፍተት ለመሙላት ብዙ ገንዘብ እንደሚያስፈልገው ሲያስብ ገንዘቡን ለማግኘት ሰውን እያጣ ያሄዳል፡፡ ሰው እግዚአብሄር ብቻ የሚሞላውን የህይወቱን ክፍተት ለመሙላት ደስታ ይሰጠኛል የሚለውን ስካርን አደንዛዠ እፅ እና ዝሙትን ይከተላል፡፡

ሰው ምንም ቢለፋና ቢጥር እግዚአብሄር ብቻ በህይወቱ ያለውን ክፍተት ሊሞላ የሚችለው ምንም ነገር አያገኝም፡፡ ሰው በህይወቱ ያለው ክፍተት እንፈዲሞላ ከክፉ መንገዱ በመመለስ ንስሃ መግባት ይገባዋል፡፡ ሰው የህይወቱ ክፍተት እንዲሞላ እግዚአብሄር ያዘጋጀለትን የመዳኛ መንገድ ኢየሱስን መቀበል ይገባዋል፡፡

ለተቀበሉት ሁሉ ግን፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን ሰጣቸው፤ የዮሐንስ ወንጌል 1፡12

ሰው የህይወቱን ክፍተት ለመሙላት እንደገና የእግዚአብሄር ልጅ በመሆን እግዚአብሄርን ሊያመልክ ይገባዋል፡፡

እንደ በጎች ትቅበዘበዙ ነበርና፥ አሁን ግን ወደ ነፍሳችሁ እረኛና ጠባቂ ተመልሳችኋል። 1ኛ የጴጥሮስ መልእክት 2፡25

አሁን ኢየሱስን ለመቀበል ከወሰንክ ይህንን ፀሎት ከልብህ ወደ እግዚአብሔር ፀልይ

እግዚአብሄር ሆይ የመዳንን እውቀት ስለላክልኝ አመሰግንሃለሁ፡፡ ሃጢያተኛ እንደሆንኩ አውቃለሁ፡፡ በሃጢያቴ ካንተ እንደተለሁ አውቃለሁ፡፡ ኢየሱስ ስለሃጢያቴ በመስቀል ላይ በመሞት የሃጢያቴን ዋጋ ሁሉ እንደከፈለ አውቄያለሁ፡፡ ኢየሱስ በሶስተኛው ቀን ሞትን ድል አድርጎ እንደተነሳ አምናለሁ፡፡ ኢየሱስ ጌታ ነው፡፡ ልጅህ አድርገህ ወደ ቤተሰብህ ስለተቀበልከኝ አመሰግንሃለሁ፡፡ በኢየሱስ ስም፡፡ አሜን፡፡

አቢይ ዋቁማ ዲንሳ Abiy Wakuma Dinsa

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #ልጅነት #ደህንነት #መልካምስራ #መልካምምግባር #ሞት #አላማመሳት #ሐጢያት #ጸጋ #አማርኛ #ስብከት #መዳን #መፅሃፍቅዱስ #ቃል #ፍጥረት #ልጅነት #ስራ #እምነት #አምባሳደር #ብርሃን #ጨው #ልጅነት #አቢይ #አቢይዋቁማ #አቢይዋቁማዲንሳ

የልብ ጤንነት

እርሱም አለ፦ ከሰው የሚወጣው ሰውን የሚያረክስ ያ ነው። ከውስጥ ከሰው ልብ የሚወጣ ክፉ አሳብ፥ ዝሙት፥ መስረቅ፥ መግደል፥ ምንዝርነት፥ መጐምጀት፥ ክፋት፥ ተንኰል፥ መዳራት፥ ምቀኝነት፥ ስድብ፥ ትዕቢት፥ ስንፍና ናቸውና፤ ይህ ክፉው ሁሉ ከውስጥ ይወጣል ሰውን ያረክሰዋል። የማርቆስ ወንጌል 7፡20-23

ሰው እንደሚያይ እግዚአብሄር አያይም፡፡ በእግዚአብሄር ፊት ዋጋው እጅግ የከበረው የልብ ጉዳይ ነው፡፡

ሰው ለስገጋ ልቡ ይጠነቀቃል፡፡ ሰው በምድር ላይ ብዙ አመት መኖር ከፈለገ ብዙ ጮማ ባለመብላት  ፍራፍሬን በመብላት እንቅስቃሴን በማድርግ በመሳሰሉት ለስጋ ልቡ ጥንቃቄ ያደርጋል፡፡

ሰው ውጭው ምንም ጤነኛ ቢመስል ልቡ ጤነኛ ካልሆነ የጊዜ ጉዳይ ነው፡፡ ሰው ውጭው ጤነኛ ባይመስል ልቡ ግን ጤናማ ቢሆን ድኗል፡፡

ሰው ብዙ ጊዜ ስለ ውጫዊው ነገር በጣም ይጠነቀቃል፡፡ ስለሚለብሰው ልብስ ስለሚነዳው መኪና ስለሚኖርነት ቤት ጥራት አብዝቶ ያስባል ይጠነነቀቃል፡፡

ሰው ለምንም ነገር ከሚጠነቀቀው በላይ ለልቡ ጤንነት መጠንቀቅ አለበት፡፡

ሰው በልቡ ክፉ አሳብ፥ ዝሙት፥ መስረቅ፥ መግደል፥ ምንዝርነት፥ መጐምጀት፥ ክፋት፥ ተንኰል፥ መዳራት፥ ምቀኝነት፥ ስድብ፥ ትዕቢት፥ ስንፍና እንዳይኖር አጥብቆ ልቡን መጠበቅ አለበት፡፡

የልብ ጤንነት መጓደል ከየትኛውም አስከፊ በሽታ ይልቅ ይጎዳል፡፡ እግዚአብሄርን ለመምሰል ለልባችን መጠንቀቅ ለአሁንና ለሚመጣው ዘመን ሁሉ ይጠቅማል፡፡

ሰውነትን ለሥጋዊ ነገር ማስለመድ ለጥቂት ይጠቅማልና፤ እግዚአብሔርን መምሰል ግን የአሁንና የሚመጣው ሕይወት ተስፋ ስላለው፥ ለነገር ሁሉ ይጠቅማል። 1ኛ ወደ ጢሞቴዎስ 4፡8

ስለዚህ ውሸትን አስወግዳችሁ፥ እርስ በርሳችን ብልቶች ሆነናልና እያንዳንዳችሁ ከባልንጀሮቻችሁ ጋር እውነትን ተነጋገሩ። ተቆጡ ኃጢአትንም አታድርጉ፤ በቁጣችሁ ላይ ፀሐይ አይግባ፥ ለዲያብሎስም ፈንታ አትስጡት። የሰረቀ ከእንግዲህ ወዲህ አይስረቅ፥ ነገር ግን በዚያ ፈንታ ለጎደለው የሚያካፍለው እንዲኖርለት በገዛ እጆቹ መልካምን እየሠራ ይድከም። መራርነትና ንዴት ቁጣም ጩኸትም መሳደብም ሁሉ ከክፋት ሁሉ ጋር ከእናንተ ዘንድ ይወገድ። ወደ ኤፌሶን ሰዎች 4፡25-28፣31

ሰው የልቡን ጤንነት ሳይጠብቅ በክርስትና እና በአገልግሎት እቋቋማለሁ ብሎ ማሰብ ሞኝነት ነው፡፡ በምንም በምንም ብሎ የልቡን ንፅህና የማይጠብቅ ሰው በንስሃ ካልተመለሰ በህይወትም ሆነ በክርስትና አይሰነብትም፡፡ የልቡን ጤንነት የማይጠብቅ ሰው ስለሚረክስ እግዚአብሄር ሊጠቀምበት አይችልም፡፡

የከበረውን ከተዋረደው ሳይለይና የልቡን ጤንነት ከሚጎዱ ነገሮች ልቡን ሳይጠብቅ በክርስትናና በአገልግሎት ፍሬያማ ለመሆን ማሰብ መታለል ነው፡፡ የልብን ጤንንት ሳይጠብቁ በክርስትና የእግዚአብሄርን አላማ እፈፅማለሁ ማለት ዘበት ነው፡፡

የልባችንን ጤንንት የምንጠብቀው በእግዚአብሄር ቃል ብቻ ነው፡፡

የእግዚአብሔር ፈቃድ እርሱም በጎና ደስ የሚያሰኝ ፍጹምም የሆነው ነገር ምን እንደ ሆነ ፈትናችሁ ታውቁ ዘንድ በልባችሁ መታደስ ተለወጡ እንጂ ይህን ዓለም አትምሰሉ። ወደ ሮሜ ሰዎች 12፡2

ልባችንን ሊያክመን የልባችንን ጤንነት ሊጠበቅ የሚችለው ለእግዚአብሄር ቃል ህክምና ራሳችንን በሰጠን መጠን ብቻ ነው፡፡

የእግዚአብሔር ቃል ሕያው ነውና፥ የሚሠራም፥ ሁለትም አፍ ካለው ሰይፍ ሁሉ ይልቅ የተሳለ ነው፥ ነፍስንና መንፈስንም ጅማትንና ቅልጥምንም እስኪለይ ድረስ ይወጋል፥ የልብንም ስሜትና አሳብ ይመረምራል፤ እኛን በሚቆጣጠር በእርሱ ዓይኖቹ ፊት ሁሉ ነገር የተራቆተና የተገለጠ ነው እንጂ፥ በእርሱ ፊት የተሰወረ ፍጥረት የለም። ወደ ዕብራውያን 4፡12-13

አጥብቀህ ልብህን ጠብቅ፥ የሕይወት መውጫ ከእርሱ ነውና። መጽሐፈ ምሳሌ 4፡23

አቢይ ዋቁማ ዲንሳ Abiy Wakuma Dinsa

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#እምነት #ሃሳብ #መነሻሃሳብ #ልብ #ንፁህ #ማየት #አለማየት #ቃል #የእምነትተጋድሎ #የእግዚአብሄርቃል #ቃሉንመስማት #እወጃ #ቤተክርስትያን #አማርኛ #ስብከት #መዳን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ